工作與生活融合能推動更好業務成果，並打造更投入的團隊。需要智慧、關懷同埋開放嘅溝通。

準時放工好習慣

開工收工係打工仔最想自行管理嘅地方。近年有提倡彈性上班時間，但行政上遇到唔少困難，尤其臨時開會唔齊人，大家冇得即興，一定要有計劃。但日常運作點會日日都有好計劃呢？

做打工仔咁多年，自命都係一個工作狂，喺工作上嘅滿足感多不勝數。人哋做唔到，我做到；人哋傾唔掂，我拆掂咗，心靈滿足到不得了！曾經喺未有家用電腦嘅年代（上世紀嘅事），留喺公司做到深夜十二點，仲畀大佬問點解咁上心咁痴線。

後來有幸做Country Manager，立定規矩每日五點半「落閘放狗」，因為五點九之前我要坐40分鐘巴士返屋企，否則要個半鐘嘥咗我時間，遲咗見小朋友。嗰段日子而家都好懷念，見到同事開心，自願加速工作，午飯都只係15分鐘，務求日日五點半準時走。

Work-life balance我覺得係Work-life integration，希望喺工作中搵到生活樂趣，喺生活裏搵到工作靈感。呢啲係工作狂嘅調節，我覺得都可以，只要搵到合適嘅步伐同節奏，就得喇！

而家市道低迷，公司希望員工行多兩步，員工希望公司多啲補貼同體諒。希望大家都可以搵到合適方法，攜手共創好嘅員工體驗共渡時艱！